پاکستان میں کرونا کی دوسری لہر شدت اختیار کرگئی، فعال کیسز کی تعداد 45 ہزار سے زیادہ ہوگئی

عکس بشکریہ: آن لائن

پاکستان میں کرونا بے قابو، فعال کیسز کی تعداد 45 ہزار سے تجاوز کرگئی، کرونا ٹیسٹ مثبت آنے کی شرح 7 اشاریہ 20 فیصد تک پہنچ گئی ہے۔

پاکستان میں کرونا وائرس کی دوسری لہر شدت اختیار کرگئی ہے، ملک بھر میں مجموعی فعال کیسز کی تعداد 45 ہزار سے تجاوز کرگئی ہے جبکہ کرونا ٹیسٹ مثبت آنے کی مجموعی شرح 7 اشاریہ 20 فیصد تک پہنچ گئی ہے۔ ملک بھر کے ہسپتالوں میں کرونا مریضوں کیلئے مختص کی گئی جگہ کم پڑتی جارہی ہے۔

حکومتی اعداد و شمار کے مطابق پاکستان میں گزشتہ شب و روز کے دوران کرونا کے 3 ہزار سے زائد نئے کیسز سامنے آئے ہیں، جبکہ 54 سے زائد اموات ہوئی ہیں۔ اسی طرح 489 مریض اس موذی مرض سے صحت یاب بھی ہوئے ہیں۔

یاد رہے اس موذی مرض سے اب تک ملک بھر میں مجموعی طور پر کرونا وائرس سے 3 لاکھ 89 ہزار سے زائد افراد متاثر ہوئے ہیں، جن میں سے 3 لاکھ 35 ہزار 881 افراد صحت یاب ہوئے جبکہ 7 ہزار 897 مریض اس وباء سے جاں بحق ہوچکے ہیں۔

پاکستان میں کرونا کا پہلا کیس 26 فروری کو رپورٹ ہوا تھا۔ اور جون تک کرونا شدت اختیار کرگیا تھا جبکہ اگست کے بعد کرونا کیسز میں کمی آنا شروع ہوگئی تھی۔