وزیراعلٰی سندھ سید مراد علی شاہ کو سپریم کورٹ کی جانب سے توہین عدالت کا نوٹس جاری، ذاتی حیثیت میں طلب

 

اسلام آباد: کراچی سرکلر ریلوے سے متعلق عدالتی احکامات پر عملدرآمد نہ کرنے پر پاکستان کی اعلٰی عدلیہ نے وزیراعلٰی سندھ سید مراد علی شاہ کو توہین عدالت کا نوٹس جاری کرکے ذاتی حیثیت میں طلب کرلیا۔

سپریم کورٹ آف پاکستان میں ریلوے خسارہ از خود نوٹس کیس کی سماعت ہوئی۔ سماعت چیف جسٹس پاکستان گلزار احمد کی سربراہی میں تین رکنی بینچ نے کی، ایف ڈبلیو او کے ڈی جی عدالت میں پیش ہوئے۔

دوران سماعت چیف جسٹس گلزار احمد نے استفسار کیا کہ بالائی پل اور تھوڑا سا کام ہے جو کہ 2 ماہ میں مکمل ہوجانا چاہئیے تھا، ایف ڈبلیو او نے تاحال سرکلر ریلوے کا کام شروع کیوں نہیں کیا؟ جس کے جواب میں ایف ڈبلیو کے ڈی جی نے عدالت کو بتایا کہ ایف ڈبلیو او نے ڈیزائن بنا کر دیا تھا لیکن سندھ حکومت نے ابھی تک منظور نہیں کیا۔

ڈی جی ایف ڈبلیو او کے جواب پر عدالت نے کہا کہ چلیں وزیر اعلٰی سندھ کو توہین عدالت کا نوٹس جاری کردیتے ہیں۔ عدالت نے نوٹس جاری کرتے ہوئے مراد علی شاہ کو دو ہفتے میں عدالتی نوٹس کا جواب جمع کرانے کی ہدایت کی۔ جبکہ سماعت آئندہ 2 ہفتوں کیلئے ملتوی کردی۔